Chin Community USA

Chin Mi USA Ram Hmaisa Thlen Nak

Chinmi upa USA thleng hmaisa pawlhi zirnak lam le pumpak ihum mi malte lawng an rak si. USA ram sungah hmun khuar ih rakum hmaisa bik tu cu Dr. Forth Nai Sang asi. July 29,1957 ahsibawi zir dingah scholarship a ngah ih rak thleng mi asi. 1948kum ah tlawng kai dingah le kum dang ih ra tlawng tu pawl khal anum ruri nan an tlung kir sal thluh.
 

Cuihnu 1970 kum hnu lam in unau sungkhat koh nak ih thleng na,hnattuan ding ih thleng na tin, inn sang in mi malte an rak thlengthok asi. Misenpi a burbur in thlen nak ngaingai cu kum 2000hrawng ah asi.1998 ihsin 2001 tiang Guam lam in siseh, 2000 hnulam in India le Malaysia lam in siseh,mi tampi an thleng ciamco ihtu ah cun zaten thei awk thluh ding hman a har zet thlang.
 

Chin Miphun Tonkhawm Nak le Dongpui Puai
 

Chin mi cu sungkhat unau rualpi le miphun duhdaw tu kan si vekin hmaisa ih rak thleng pawl khal in mah le um nak cio ah sungle khat le rualpi pawl sawm aw ton in nun naw nak puai an rak tuah ṭheu.
 

A hmaisa bik Dongpui cu 1986 kumah pu Thawnghmung te in Tawkdun hnak Dongpui puai tin Portsmouth, Virginia khua ih pu Kulh Ci tei inn ah feh tahrat in an rak tuah thok.
 

Cu vek thotho in 1994 kum ihsin pu Kawl Lian, pu Van Lian Kio le pu Jacob Lian ih hoha nakin kumtin Atlanta khua ah Fanger puai sunglawi zetin an rak tuah ve ttheu asi.

Chin Community USA Din Thok Nak

2002 kum cun laimi tawk fang zet US kan thleng zo ruangah state dangdang ah um cio hman sehla peh zom awk nak kan neih a ttul ti kan thin lungah a suak cio. Ton khawm awk nak kan neih nak ah pawlkom neih ding thu kan lung a kim cio.
 

Cutin Lailun Foundation ih hoha nakin July 05, 2002 Atlanta khualipi ah Chin calai seminar (Falam) cu state tinin calai duhdaw tu pawl sawm khawm in tuah asi. Cui zan ah pu Ngun Lian tei inn ah mipi tong khawm aw in a ra suaktu mipi tam sawn ih lungkim nak in Chin Community of USA cu din thok asi.

Chin Community USA ding suak thei dingah “Tungzing Kawmiṭi” hrilmi upa pawl cu:

• Rev. Dr. David Lai Sum (Convenor)

• Pu Fung Dun (Co-convenor)

• Pu Sui Ling

• Pu Hrang Thawng

• Pu Lal Nei Mang

• Pu Van Tuah Piang

• Pu Hantinko Zahau

Chin Kum Thar Puai

Chin Kum Thar puai (Chin New Year Festival) cu, Falam hnahthlak sungah cun Fanger, Dongpui, Tho, Kut, le hmin dang ciar in tuah ttheu asinan a ti duh san le bangaw fawn zate ih hman tlang thei mi Chin Kum Thar ti hi a ttha bik ding tiah hril sannak a si.
 

Kan pupa pawlin Lai kumthar (Fanger) cu lo rawl an lak ttheh hnuih thla thul hmaisa bik (Full moon) ah an tuah. Lai Kum Thar hi Laimi kan si nak langter tu le kan pupa pawl ih lai kum siar nak (kum cang rel nak) a si.
 

Rawl thar an lomnak le kumthar an hmuak nak puai khal asi tiah a tawi zawng cun kan ti thei. Cuti ih Fanger puai an tuah tikah Khawzing Pathian hnen ah kum hlun sungih a thluasuah zomi parah lungawi thu an sim ih kum thar hrang khal ah thluasuah an dil.
 

Cuitlun ah Fanger puai an tuah nak ruangah khawpii pawl khal duhdawt awk nak le tanrual nak a suah ter sinsin. Kan pupa pawlin Khawzing Pathian tel lo in puai an rak tuah dahlo. Cu ruangah Chin Kum Thar puai kan tuah tikah Pathian biak nak tel lo in nomnak lawnglawng ruat in kan tuah pang asi ah cun kan pupa pawlih Lai Kum Thar puai tuah duh san nak kan thelh ding asi.
 

Curuang ah Chin Kum Thar puai tinte hmun khat te ah biakkhawmnak khal neih ringring ding a si.

Kan Nunphung le Kan Hnamdang Kilkhawi Nak

Kan ttong le hi kan pupa nunphung ttha zet mi hi ṭha te in kan kilkhawi lo ih kan thih ter ah cun a rei hlan ah nunphung (Culture) neilo, mi phun hlo kan si ding.
 

Cu ruangah kan nunphung ttha zet mi pawl hlo lo dingin, Laithuam thil, hni le puan kan neih mi thawn kan nunphung kilawin phah in kan Chin Kum Thar puai ah kan Laihla, kan Lailam le kan nunphung pawl a cang thei tawk in lang tir kan zuam cio pei.

Cuti in kan nunphung ttha te ih kan kilkhawi theinak ding ah le pumkhat te ih kan tanrual sinsin theinak dingah Chin Kum Thar puai hi kumtin ten tuah thei dingah zuam sinsin uhsi.
 

Himi tikcu caan ah kawhhran lam khal in khawmpi siseh, crusade siseh, innsung saang tonkhawm awk nak le a dangdang pawl cu tuah lo hram in Chin Kum Thar puai ah nuam zetin hmangtlang sawn dingah kan sawm aw a si.